GSCHICHT VOM LIFT

1990 händ d'Silvia und dä Gottlieb "Godi" Siegfried, Biopuurä vom Sitzberg kurzentschlossä en öpä 200 Meter langä Ponylift kauft. Di vorherige Bsitzer händ noch 10 Johr dä betrieb i dä Steig iigstellt. Bis 2005, also 15 Johr lang händ d'Silvia und dä Godi den Schilift betribä und underhaltä. Under dä Iiheimische hät me numä vom "Godilift" gredt.

D'Silvia und dä Godi händ dä Jugend vom Pirg während dä Wintermönät amigs ä sinnvolli Freiziitbeschäftigung aabotä. En huufä Chind händ am Godilit glärnt Schifahrä und mit dä Silvia als Uufsichtsperson isch sichergstellt gsi, dass d'Eltere alarmiert wordä sind, wänn's dä Junior überschlagä hät oder s'Töchterli fascht verfrore isch. En Schilift also mit integriertem Babysitter. Wo häts da susch scho gää! Nomol en herzlichä Dank für dä langjöhrig Iisatz zum Wohl vo dä jungä Pirgler. 

Im Früelig 2006 isch dänn bekannt wordä, dass d'Silvia und dä Godi dä Schilift ufgäh wänd. Dä Entscheid isch noch derä lange Zyt zwor verständlich gsi, isch aber vomene grosse Teil vo dä de Bevölkerig vom Pirg - bsunders natürli von dä Chind und Jugendlichä - sehr bereut wordä. Es hät sich dänn au scho schnell emol ä Gruppä vo iIntressierä Lüüt und Familiä bildet, wo dä Godilift händ welä rettä und witer betribä.

Nimm's di Wunder wiä diä Gschicht wiitergoht?I